«Назарбаев Университетінің» мамандарымен кездесу

«Назарбаев Университетінің» мамандары Ақтөбеде. Астаналық профессорлардың мақсаты – Марат Оспанов атындағы БҚМУ-нің бакалавр түлектеріне арнап үгіт-насихат жүргізу.

Медицина мектебінің профессорлары қоғамдық денсаулық сақтау, жалпы медицина фаультетінің бітіруші түлектерін «Назарбаев Университетінің» спорттық медицина және реабилитологияның магистрлік бағдарламасы бойынша оқуға шақырды. Спикер, «Назарбаев Университетінің» магистрлік бағдарламалар бойынша директоры Елтай Рахманов пен профессор Сеед Али спорттық медицина және реаблитология бойынша магистрлік бағдарламалар жөнінде дәріс оқыды.

Кездесу пікір алысу сипатында өтті, өз кезегінде студенттер тарапынан қойылған сұрақтарға ресми өкілдер тарапынан толыққанды жауап қайтарылды. «Назарбаев Университетінің» үгіт-насихаттық жобасындағы спорттық медицина және реабилитология бойынша магистрлік бағдарлама «спорт медицинасы» мамандарын әлемдік стандартқа лайықты даярлау, сөйтіп, әлемдік кадр нарығында бәсекеге лайықты отандық медицина мамандарын шығаруға негізделген.

Назарбаев Университетінің Медицина мектебі (ММ) бұл Қазақстан Республикасы үшін денсаулық сақтау, білім беру және биомедициналық зерттеулер саласындағы медицина көшбасшыларын даярлайтын, білім беру бірыңғай ағылшын тілінде жүргізілетін, американдық оқыту жүйесінің негізінде құрылған ең алғашқы оқу орны болып табылады. Медицина мектебі магистратура, медицина докторы және резидентура бағдарламаларын ұсынады.