Қытай ғалымдары университетке келді

Университетке іс-сапармен Гонконгтағы Қытай университетінің профессорлары Carmen Chan мен NG Shek Nam арнайы келді. Сапар аясында мәртебелі меймандардың университет әкімшілігімен ресми кездесуі өтті.

Ректор міндетін атқарушы Надияр Мусин шетелдік ғалымдарға арнайы презентациялық шолу жасап, жетпіс жылға жуық тағылымды тарихы бар оқу орны туралы ақпарат берді.

Екі тарап оқу-тәрбие процесі мен халықаралық ынтымақтастық, әріптестік байланыстарын жан-жақты талқылап, осы бағыттарда өзара пікір алмасып, ой бөлісті. Кездесу соңында қонақтар университеттің өткені мен бүгінінен сыр шертетін музейіне экскурсия жасап, ондағы тарихи құнды экспонаттармен танысты.

Атап өтсек, қытай ғалымдарының оқу орнымызға іс-сапары бірнеше күнге жалғасады. Алдын-ала жоспарланған бағдарлама бойынша Қытай университетінің профессорлары Медицина орталығы басшылығымен кездесіп, «ДАРУ», «Аяла» оңалту орталықтарының жұмыстарымен танысады. Сондай-ақ, екі тарап өзара ынтымақтастық негізінде бірқатар ресми келісімдерге келеді деп күтілуде.