Белбеу күресінен чемпион атанды

18-20 қазан күндері елордасы Астана қаласында еліміздің Белбеу федерациясының ұйымдастыруымен 23 жасқа дейінгі жастар арасында белбеу күресінен Қазақстан Республикасының чемпионаты өтті. Дәстүрлі дүбірлі додаға 13 облыстан 300-ге жуық спортшы қатысып, бақ сынасты.

Ақтөбе облысының атынан университетіміздің стоматология факультетінің 5-курс студенті Анаргүл Айтқали қатысып, 48 келі салмақ дәрежесінде облыс намысын қорғады. Жарыстың ақтық сынында Түркістан облысынан келген спортшыны ұпай санымен ойсырата жеңіп, жүлделі І орынды қанжығасына байлады. Жаттықтырушысы Сағадат Естлеуов.

Атап өтсек, осыған дейін түрлі деңгейдегі жарыстарда топ жарып, жүлдегер атанған Анаргүлдің бұл — алғаш рет І орынды иеленіп, чемпион атануы.

Облыс намысын қорғап, университет мерейін үстем еткен, болашағынан зор үміт күттіретін жас спортшымызды жеңісімен құттықтап, алдағы жарыстарда да жеңіс тұғырынан көрінуіне тілектестігімізді білдіреміз!