Ғылым мен білім құндылығы — тәрбие көзі

Университетте «Discovering Science» Ғылым апталығының кульминациясы «Эксперименттік, профилактикалық және клиникалық медицинадағы өзекті мәселелер» тақырыбында өткен студенттік республикалық ғылыми-практикалық конференция болды. Аталған шара патологиялық физиология кафедрасының 65 жылдығына және профессор, ұлағатты ұстаз Жолдықайыр Сүндетовтің 80 жылдық мерейтойы мен Ақтөбе қаласының 155 жылдығына орай ұйымдастырылды.

Шараның салтанатты ашылуы профессор Жолдықайыр Сүндетовтің өнегелі өмірі мен шығармашылығына арналған бейнефильммен басталды. Ректор міндетін атқарушы Надияр Мусин студенттерге ақыл-кеңесін айтып, оқуда озат болуларына тілектестігін білдірді. Сондай-ақ, ғалымның әріптестері, фармакология кафедрасының профессоры Н.Мавлюдова, микробиология, вирусология және иммунология кафедрасының доценті М.Жарасов пен профессордың шәкірттері сөз сөйлеп, студенттердің білім мен ғылымдағы жетістіктері үшін алғыстарын білдірді.

Шарада кафедра атынан оқу үздіктері мен белсенді студенттерге профессор Ж.Сүндетов атындағы стипендия табысталды. Сонымен қатар, пән бойынша жаңа әдебиеттердің кітап көрмесі ұсынылып, секциялық алаңдарда студенттердің өзекті тақырыптар бойынша баяндамалары тыңдалды.