«Дүние дидарындағы Димаш» көрмесін тамашалады

Қоғамдық-гуманитарлық пәндер кафедрасының аға оқытушысы, куратор Гүлнар Қалманова бастаған жалпы медицина факультетінің 107-108-топ студенттері 95 жылдық тағылымды тарихы бар облыстық тарихи-өлкетану музейінде болып, Қазақстанның халық әртісі, әлемге әйгілі әнші Димаш Құдайбергеннің шығармашылығына арналған «Дүние дидарындағы Димаш» атты көрмесін тамашалады.

Музейдің экскурсия ұйымдастырушысы Данагүл Әзім болашақ дәрігерлерге әлемді ауызына қаратқан алтын дауысты Димаштың әншілік өнерін паш етіп, қазақы рухани бай болмысын бейнелейтін, өнегелі өміріндегі елеулі оқиғалар туралы хабар беретін құнды заттары және белгілі тұлғалар мен жанкүйерлердің тарту еткен сыйлықтарымен таныстырды.

Сондай-ақ, студенттер зәулім музей төріндегі орны бөлек көрмемен қатар тақырыптық-экспозициялық залдарын да тамашалап, егеменді еліміз бен киелі өлкеміздің өткені мен бүгінінен сыр шертетін тарихи құнды экспонаттарымен танысып, мол ақпарат алды.

Экскурсия соңында студенттер музей ұжымына алғыстарын білдірді.